مهم للعلاقة الزوجية

منقول من مدونة بنت خيخة و أى كلام

النظافة من الإيمان


البوست ده بناءاً على طلب الجماهير
وهما مش جماهير أوى بصراحة
هما اتنين بس من القراء الأعزاء
واحد وواحدة
بيعانوا من نفس المشكلة
وهى عدم نظافة شريك الحياة
وطلبوا مني انى أكتب عن الموضوع ده
الراجل اللى بعتلي مشكلته
كانت مشكلته صارخة ومقززة
وحالته تصعب على الكلب الاعور الحزين
اما البنت فامشكلتها بسيطة بجانب مشكلة الراجل
ولو انها تظل مشكلة مقرفة برضه
انا مش هادخل فى تفاصيل المشكلة
لكن من كلامى اعتقد انكم هتفهموها وهى طايرة
النهاردة كلامي عن النظافة
نضافة شريك الحياة
هاتكلم فى الاول عن نضافة الست
يعنى الكلام ده موجه للستات دلوقتى
والكلام برضه من وجهة نظرى انا
يعنى يحتمل الصواب ويحتمل الخطأ
ويحتمل انى اكون مزوداها شويتين
لان موضوع النظافة بيكون نسبة وتناسب
وتختلف درجته من شخص لأخر
كلامى للستات المتجوزين
النضافة اساس اى شئ
ودرجة نظافتك لنفسك ولبيتك ولعيالك
بتؤثر بشكل أو بأخر بعلاقتك بجوزك
يبقى لازم تهتمى جدا بنظافة كل ماهو حولك
ليييييييييييييييييييييه؟
علشان لو جوزك رجع من شغله
ولقى إن رحتك مش حلوة وهدومك مبقعة ومبهدلة
وعيالك هدومهم وسخة وعليها بقايا اكل
وعيونهم معمصة ومناخيرهم مبربرة
وارضية البيت مش مكنوسة
والمواعين تضرب تقلب فى المطبخ
والملاية بتاعة السرير متربة وحالتها حالة
جوزك غصب عنه هيقرف منك ومن عيالكم
ومن البيت وهيبقى مش طايق الرجوع للبيت
يبقى انتى هتعملى اييييييييه؟
انتى لازم تبقى نضيفة ولابسة لبس نضيف
مش هاقولك البسى واتزوقى
لأن حتى ولو كنتى لابسة
قميص نوم كستور بس نضيف
هتفرق مع جوزك
لما يكون شعرك متسرح
ولو حتى كنتى عملاه كحكة على قفاكى
بدل امنا الغولة اللى بيرجع يلاقيها قدامه
دى حاجة هتفرق معاه
انا مش بقولك اصبغيه
أو اعمليه سشوار انا بقولك سرحي شعرك
وعلى فكرة ابسط قواعد التزويق هى امور النضافة
يعنى مش لازم تكونى لابسة
حاجة مثيرة علشان تبقى حلوة
لكن لازم اللى انتى لابساه ده
يكون نضيف علشان جمالك يكتمل
ومش لازم تبقى صبغة شعرك علشان تكونى حلوة
لكن لازم تكونى مسرحة شعرك علشان تكونى حلوة
لما ولادك يكونوا نضاف وبتحميهم كل يوم
ولو وقعوا حاجة على هدومهم تغيريها فورا
ومتسبيش البرابير على مناخيرهم
وعلطول تحطيلهم كولونيا
هتلاقى جوزك لما بيشوف العيال
بياخدهم فى حضنه وبيلعب معاهم
لانه مش قرفان منهم
ابقي اكنسي بيتك من وقت للتانى
واغسلى المواعين بانتظام ويوم بيوم
وحتى لو بتجيلك شغالة
ماتعتمديش عليها اعتماد كلى
افرضى لاقيتى عنكبوت معشش فى اوضة النوم
مش معقول ابدا تسيبى العنكبوت
لحد ماتيجى الشغالة تشيله
شيليه انتى يا بطة منك ليها
لو بنتك اتقايت فى الحمام
مش معقول ابدا تسيبى القيئ
لحد الشغالة ما تيجى تانى يوم تمسحه
لو حاجة ادلقت على الترابييزة
قومي فزي وامسحى الترابيزة
بلاش جوزك يرجع من الشغل
يلاقى أن اثار قعر كوبايات الشاى
اللى اتدلدأ منها حبة شاى الصبح
لسة موجودة من صباحية ربنا
وانك مافكرتيش طوال الاتناشر ساعة
اللى غابهم طول اليوم
انك تجيبى حتة القماش البيضا اللى فى المطبخ
وانك تمسحي أثار الدلدئة
لو كنتى مطولة ضوافرك نوع من انواع الانوثة
يبقى لازم تهتمى بيهم دايما
وتبرديهم وتنضفيهم من الميكروبات السودا
لو انتى مش بتطوليهم
يبقى لازم كل يومين تقصفيهم بالقصافة
علشان اهمالهم بيلم الميكروبات السودا
وبيخلى شكل ايدك مقرف
لو بتاكلى سمك مشوى
وضوافرك طويلة
بعد ما تقشرى السمك المشوى
روحى اشطفى ايدك من القشر
علشان القشر بيدخل بين ضوافرك
وبيخلى شكل ايدك بشع
وممكن عين جوزك تقع على ايدك
وهى فى الحالة دى
وساعتها هيكون منظرك مقزز جدا
اعملى سويت دايما
فى منطقة العانة ومنطقة تحت الإبطين
شريف هاني بيحب مامي وبابي وبحب نوني كمان وبابلو
معلش يا جماعة بس الجملة اللى فوق دي
شريف اصر انه يملهاني واصر انى اكتبها قدامه
وقالى اوعى تمسحيها وانا وعدته انى مش هامسحها
المهم نرجع لكلامنا
كنت بقول على موضوع السويت
ياستات يا متجوزات
نضافة اجسامكم تؤثر بشكل كبييييييييير
فى مسألة الهونجا بونجا
ولما الهونجا بونجا تبقى تمام
الحياة الزوجية بتكون تمام بنسبة كبيرة
بين قوسين مش دايما
نيجي للرجالة بقى
وعلشان صاحبة المشكلة على اخرها من جوزها
ومش عارفة تعمل معاه ايه
انا هاقول نصايح عامة
وان شاء الله زوج المدعوة يقرا
وعله يستفيد
يا رجالة
لو سمحتوا من فضلكم
اغسلوا رجليكم بعد ماتقلعوا الجزمة
لأن ريحة رجليكم بتكون مأساوية بشكل غير طبيعي
ولو سمحتوا اغسلوا اسنانكم بانتظام
ولو مش عايزين تغسلوها بانتظام
يبقى أقل مافيها تغسلوها قبل ما تبوسوا مراتتكم
خصوصا المدخنين منكم وأكلى البصل والتوم
لأن ريحة بؤكم بتقرف الكلب الأعور الحزين
وبلاش التجشؤ بصوت عالي
وبلاش تعملوا بوئة قدام مراتتكم
ابقوا ادخلوا الحمام وجيصوا براحتكم فيه
وابقوا خففوا شعر الإبطين ومنطقة العانة
علشان مراتتكم متقرفش منكم
فى مسألة الهونجا بونجا
يعني بلاش الست تحس
انها بتعمل هونجا بونجا مع غوريلا
وبلاش تعملوا الصوت اللى هو
بتجيبوا برابيركم من اعماق مناخيركم
وتيجوا تافينها فى الحوض
ابقوا اعملوا الحركة دى
وانتوا قافلين على نفسكم باب الحمام
وبلاش تعملوها فى العلن وتروحوا الحمام
عند اخر لحظة اللى هى لحظة تف البرابير
يعنى ياريت بعد اذنكم كل مراحل تف البرابير
تتعمل فى الحمام ويكون بابه مقفول عليكم
بس خلاص
أخر الكلام
من نظف ثوبه قل همه ... و من طاب ريحه زاد قدره
إنتهى
بت خيخة وأي كلام

(منقول بالنص بدون أى تصرف منى)

زواج القاصرات و العنوسة

زواج القاصرات و العنوسة

موضوع على الماشى

من المفارقات الغريبة أنه مع تزايد مشكلة تأخر سن الزواج و تضخم مشكلة العنوسة نرى أنا هناك جهات كثيرة حكومية و غير حكومية كرست جهدها لمحاربة زواج القاصرات! فى هذا الموضوع غرابة حيث أن هذه الجهات من الواضح أنها تحارب ظاهرة قد تكون غير حقيقية لأنه لو أن هذه هى المشكلة فمن أين أتت العنوسة؟؟!! و بالتدقيق فى المسألة نجد أنهم تركوا المشكلة الحقيقية (و هى تأخر سن الزواج) و أداروا ظهرهم لها بحجة أنهم منشغلين بالزواج البكر (طيب هو فين الزواج من أصله؟ هو حد عارف يتجوز)، أم أنهم يديرون ظهرهم للفيل و يبحثون عن النملة؟

نقطة أخرى فى هذا الموضوع، و هى أن هؤلاء الذين شغلوا نفسهم بالزواج المبكر يأخذون مبادئهم من الغرب الذى يرفض الزواج المبكر و لكنه يشجع الزنا فى سن مبكرة و أعتقد أننا نعلم أن فى المدن الأمريكية معظم الفتيات يصلن إلى سن الخامسة عشر و هن فاقدات لعذرياتهن و بتشجيع من المجتمع حيث أنهم يرون أن ممارسة الجنس إحتياج ضرورى للبالغين. إذا و بما أنهم يعلمون أنه احتياج ضرورى فلما يمنعوه فى الحلال (الزواج) و يشجعوا عليه فى الحرام! أم أنه مجرد عند لشريعة الله و محاربة لله تعالى؟

تدبروا هذا الموضوع و فكروا فيه و انظروا هل من الأفضل أن نصل لاحتياجتنا بمرضاة الله و اتباع شريعته ، أم بمرضاة الشيطان و اتباع ضلاله؟

أزواج للبيع

في إحدى المدن تم افتتاح متجر لبيع (الأزواج) حيث يمكن للمرأة الذهاب لاختيار زوج بنفسها ومن بين التعليمات التي وضعت في المدخل حول أسلوب عمل المتجر: أن للمرأة فرصة الدخول مرة واحدة للمتجر ! ويمكن الاختيار من أحد الطوابق أو الذهاب إلى الطابق الآخر الأعلى منه ولكن لا يمكن النزول إلى أسفل। : : دخلت إحدى النساء (لمتجر الأزواج) لاختيار زوج لها في مدخل الطابق الأول علامة : الرجال هنا لديهم عمل ومؤمنون بالله وفي مدخل الطابق الثاني علامة : الرجال هنا لديهم عمل ومؤمنون بالله ويحبون أطفالهم وفي مدخل الطابق الثالث علامة : الرجال هنا لديهم عمل ومؤمنون بالله ويحبون أطفالهم وشكلهم جذاب ॥وكانت المرأة تـفكـر 'واو ولكن سأستمر بالصعود' وقد وصلت إلى الطابق الرابع لتجد علامة : الرجال هنا لديهم عمل ومؤمنون بالله ويحبون أطفالهم وشكلهم جذاب ويساعدون زوجاتهم في أعمال المنزل ( يعني سؤال ... وش تبيون اكثر من كذا ؟؟!! لكن شوفوا نهاية الطمع ..استمروا بالقراءة ) ..فتعجبت في خلجات نفسها ' يا إلهي إني لا أستطيع التحمل سأوافق ' ولكنها استمرت بالصعود وفي مدخل الطابق الخامس وجدت علامة : الرجال هنا لديهم عمل ومؤمنون بالله ويحبون أطفالهم وشكلهم جذاب ولهم قابلية رومانسية عالية لمغازلة زوجاتهم دائماً وكادت أن تطأ قدمها ذلك الطابق إلا أنها استمرت بالصعود وفي مدخل الطابق السادس وجدت علامة : أنـت الـزائـرة رقـم 4.363.012 ليس هناك أي رجال في هذا الطابق لأن هذا الطابق وجد خصيصا كبرهان أن النساء لا يمكن إرضاؤهم شكراً للتسوق في 'متجر الأزواج' وانتبهي لخطواتك وأنتِ تخرجين ونتمنى لكِ يوما سعيداً

(منقول)

عيد أضحى مبارك

كل عام و أنتم بخير

بمناسبة عيد الأضحى المبارك أعاده الله على المسلمين بالخير و اليمن و البركات

و نسأل الله السعادة لكل زوجين و لكل بيت و يقوى الروابط الأسرية

و ينعم على الجميع بنعمه و فضله العظيم

الحالة الإقتصادية السبب السابع عشر

السبب السابع عشر


الحالة الإقتصادية

بصراحة يا جماعة نظرا للأزمة الإقتصادية الطاحنة التى نمر بها فمن يتزوج هذه الأيام يكون بطل!
فعلا بطل أصلها بحسبة بسيطة تجد إنها شبه مستحيلة!
يعنى الآن الشقة التى تصلح للسكن لا يقل ثمنها عن مائة و عشرون ألف جنيه و تستلمها طوب أحمر، طبعا علشان تدخل فيها مياه و كهرباء و تمحرها و تشطبها أظن تحتاج حوالى ستين ألف جنيه كمان. ده بالإضافة للعفش و الفرش و الأجهزة أي كانت التقسيمة كده كده العريس محتاج يشترى حاجات بحوالى ثلاثين ألف جنيه علشان الحاجة تكون معقولة فى المتوسط يعنى.
لو جمعنا دول يكون

120.000
60.000
30.000
=
210.000
مائتان و عشرة آلاف جنيه

طبعا ده غير المهر و الشبكة و مصاريف الفرح و الزفة و الفستان و البدلة و... ياه دى حاجات كثير قوى أظن الفرح لوحده يتكلف على الأقل خالص خمسة آلاف ده لو مصرفناش، و معرفش الشبكة و المهر الوقتى يعملوا كام؟ أسمع إن فيه ناس كتير طنشت الموضوع ده.

عموما من غير ما نحسب أظن إننا قربنا من إجمالى مائتى و خمسين ألف جنيه يعنى ربع مليون جنيه على فكرة أيام ما أنا اتجوزت كنا لم بنسمع الرقم ده بنتخض و نقول رووبع مليووون جنيييه يااااااااه. على فكرة أنا مش قديم قوى أنا متزوج من ثمان سنوات و بالمناسبة اليوم هو يوم زواجى، أقصد إننا لا نقارن بين أجيال بعيدة و لكن ممكن تقولوا إن أنا لسه فيه ناس من سنى متزوجين السنة دى يعنى نفس جيلى بس اختلاف توقيت بس بصراحة صرفوا مصاريف جامدة جدا.

أنا عايز أقول لكم شوية مقارانات ما بين الآن و من ثمان سنوات مضى
ممكن وقتها تجد شقة جيدة ثمنها حوالى خمسون ألف، الآن أصبح سعرها مائة و ستون ألف جنيه.
جرام الذهب كان بخمسة و ثلاثون جنيها و الآن بمائة و ثلاثون جنيها.
الجنيه الذهب كان بثلاثمائة و عشرون جنيها و الآن أصبح بألف و مائتان و خمسون

طبعا ده غير أسعار الحديد و الأسمنت التى لا يمكن مقارنتها و أجور العمال التى توحشت.

طيب لو الحمد لله الشاب عمل المعجزة و عرف يتزوج تفتكروا ممكن يعمل معجزة ثانية و يعرف يصرف على البيت؟ و معجزة ثالثة لما ينجب أطفال هل يستطيع الإنفاق عليهم؟

ربنا يقدره
أنا شخصيا مذهول من تدنى قيمة النقود فأصبحت فجأة الألف جنيه لا تساوى شئ و المأساة إن فيه أسر كثيرة دخولها لا تصل إلى خمسمائة جنيه لاحظوا أنا قلت أسر و ليس أفراد، يعنى لو أسرة مكونة من أربع أفراد يكون نصيب الفرد مائة و خمسة وعشرون جنيها طوال الشهر!
تفتكروا يعمل بيهم إيه؟ ياكل بيهم؟ مايكفوش! طيب يركب بيهم مواصلات؟ برضه ما يكفوش!
عارفين ممكن يشترى بيهم فى شهر بنزين و مرتب الشهر اللى بعده يشترى كبريت علشان فى الشهر الثالث يولع فى نفسه.

ما علينا سيبنا من الناس الغلابة قوى دول على أساس إن الدولة مش معترفة بوجود هذا القدر من المأساة خلينا نتكلم فى الناس الغلابة الأحسن شوية اللى كان اسمهم زمان الطبقة المتوسطة دول دخلهم الآن فى حدود ألفين جنيه على فكرة المبلغ ده حلو جدا لشاب بطوله يصرف منه و يروق على نفسه و يكون مبسوط قوى لكن لو وقعت واقعة الجواز هيتحسر على نفسه لإنه سيكتشف إن مالهمش لازمة. تفتكروا الشاب ده أصلا ممكن يشترى شقة و يشطبها؟ على الحساب بتاعنا هو محتاج مائة و سبعون شقة و تشطيب يعنى
170.000
÷
2.000ده المرتب كله
=
85 شهر
=
7.5 سنوات

كويس جدا يعنى الشاب ده ممكن يحوش ثمن الشقة فى خلال سبع سنوات و نصف يعنى لو اشتغل بعد تخرجه فورا يكون حوش المبلغ و عنده تسعة و عشرين سنة تقريبا، بس بشرط ما يصرفش و لا جنيه من مرتبه – كنت هأقول مليم و سحتوت و بعدين لقيت إن قيمتهم زمان أحسن من جنيه الآن فاتكسفت – يعيش محنط بدون أكل ولا شرب و يروح الشغل من غير ما يركب مواصلات لأنه لو عمل أى حاجة مش هيلحق يحوش فى سبع سنين و كمان و لا فى عشرين سنة و لا فى حياته كلها.

خدو بالكم على ما الشاب يحوش الفلوس كلها هتكون الأسعار اتغيرت تماما يعنى الفلوس اللى حوشها مالهاش لازمة.

أوعوا يا جماعة حد من الشباب يحبط فيه ناس كثير عملت المستحيل و اتجوزت.

طيب إيه الحلول؟
ممكن تعتمد على التمويل العقارى هيدوك الشقة أم مائة ألف بمتين ألف و يدفعوك قسط ألف و خمسمائة جنيه كل شهر. يعنى مرتبك بعد ما تشيل منه المواصلات و برضه مش هتاكل
أو ممكن تاخد إيجار جديد و تدفع ألف جنيه بس ممكن فى أى لحظة صاحب البيت يقول لك عاوز الشقة و يرمى لك العفش من البلكونة.
خلاص خذ إيجار قديم و ادفع لك قد خمسين ألف كده و عليهم خمسمائة جنيه كل شهر.

كلها حلول صعبة مش كده

واضح طبعا أنها أزمة عنيفة لا أستطيع أن أنكرها بس يا ترى عارفين أيام جدودنا كانوا بيعملوا إيه؟ كان كل شاب بيتجوز فى بييت أبوه و واحدة واحدة ربنا يكرمه و يكون له بيت خاص، طبعا وجود الناس فى مجموعات يقلل التكلفة على الفرد. كانت حلوة أوى فكرة بيت العيلة دى بس نفوس الناس الآن لا تتناسب مع هذا النظام و لكن من الناحية الإقتصادية موفر جدا لأنك ستجد عدد من الأسر داخل بيت العائلة كلهم مشتركون فى إيجار بيت واحد و فاتورة كهرباء واحدة و كذلك المياه و الغاز و التليفون و سيستخدمون موقدا واحدا لطهو طعام كل الأسرة و أى أعمال صيانة ستكون مقسمة على الأسرة. و هذا كله أيسر بكثير من أن يتحمل كل زوج على حدة جميع مصاريف شقة كاملة له وحده.

طيب إيه الحل؟
أول حاجة لازم نكون فاهمين إن كل واحد مسئول عن نفسه و ماحدش بيأكله غير إيده و من عرقه. و طبعا سيادة رئيس الوزراء قال لنا الحكومة مش بابا و ماما علشان تأكلكم، أنا بصراحة استغربت الكلمة دى و سألت نفسى هو من امتى و الحكومة بتأكل حد؟
ثانى حاجة لازم نجتهد لرفع كفائتنا و نسعى بجد من أجل الرزق موقنين أن الرزاق هو الله و لا أحد غيره و نتوكل على الله و لا نتكاسل ثم نشكو من ضيق العيش.
ثالثا يجب ألا نسرف حتى نستطيع الإدخار، فلا نضيع أموالنا فيما لا يفيد و ربما يضر فلا نهدر أموالنا على التدخين و المياه الغازية و اللهو ثم نشكو من عدم كفاية المال
رابعا أرجو من الأهالى أن يتقوا الله فى الشباب فلا يثقلوا كاهلهم بطلبات تمنع الزواج من فداحة تكاليفها، فلا يشترط أهل العروسة أن تكون الأرضيات باركيه أو بورسلين.
خامسا عدم النظر إلى ما عند الآخرين بل كل يسعى ثم يرضى برزقه

هذه حلول على مستوانا كأفراد من عامة الشعب أما الحلول على مستوى الدولة فنسأل الله أن يأتى بالفرج من عنده و لكن اعملوا فالله يرى أعمالكم.
قبل ما أمشى كنت عاوز أقول حاجة للبنات
قبل ما تقولى على عريسك بخيل إتأكدى أول من قدراته المادية فربما يكون كريم و لكنه عاجز عن إظهار كرمه لقلة دخله فالمهم أخلاقه و معاملاته و ليس ماله.

البحث عن الوهم (الاختيار الخاطئ) السبب السادس عشر

السبب السادس عشر


البحث عن الوهم (الاختيار الخاطئ)

يا ترى الناس اللى عايزين يجوزوا عايزين يجوزوا مين؟ و ليه؟
حد فكر الناس بتتجوز ليه؟ يعنى إيه هدفه من الجواز؟
طيب و إيه مواصفات شريك الحياة؟ و يكون مين؟ و صفاته إيه؟ و ليه بالذات الصفات دى هى اللى تم اختيارها؟

هما سؤلين شكلهم بسيط جدا بس تخيلوا قليل قوى الناس اللى عارفين الإجابة الصح و كمان اللى عارفين الإجابة الصح قليل منهم اللى عرفوا يطبقوا الاختيار الصح.
عجبى

طيب هو البنات اليومين دول عايزة عريسها يكون إيه؟
الآراء اللى بنسمعها كالآتى:

يكون رومانسى.
يكون أمور و وسيم.
يكون شبه براد بت، ده واحد ممثل.
يكون الإنجلش بتاعه قوى، معلش عيب نقول إنجليزى.
يكون معاه فلوس كثير.
يقدر يفسحنى فى كل حتة فى العالم.
يقدر يجيبلى فيلا و عربية فخمة
يعنى يكون حاجة كده أعرف أغيظ بيها البنات.


طيب و الشباب عايزين إيه؟
تكون ملكة جمال.
يا سلام لو من عيلة غنية و ترفعنى لفوق.
تكون اجتماعية و لبقة و ليها فى الحفلات و ماتكونش مقفلة.
تكون جامدة كده و ماتخلنيش أبص لبرة.
تعيشنى الرومانسية.


غير كده طيب هو الناس بتتجوز ليه؟
فيه بيجوزوا لمجرد الواجهة الاجتماعية.
فيه بيتجوزوا علشان زن الناس حولين منهم و السؤال المستمر المستفز هو انت ما بتتجوزش ليه؟ و هو انت بتتأمرى ليه على العرسان عجباكى قعدتك دى؟ طيب يا جماعة انتوا مالكوا؟ ما اللى عايز يتجوز يتجوز و اللى مش عايز هو حر، هنستفيد إيه لما نخلى ناس تتجوز بالعافية و هى مش عايزة تتجوز؟ و اتجوزوا لمجرد كلام الناس!
فيه بيتجوزوا علشان دى مرحلة من مراحل الحياة لازم تتعمل زيها زى الطفولة ثم التعليم ثم الوظيفة ثم الزواج و الأطفال.

عموما إسألوا السؤال ده لنفسكم و جاوبوا على نفسكم بصراحة و شوفوا عايزين تتجوزوا و لا لأ؟ و ليه؟ و عايزين تتجوزوا مين؟


ممكن أجاوب أنا؟

شكرا

الإجابة كالآتى:

عايزين نتجوز؟
الطبيعى إننا نكون عايزين نتجوز لأن دى فطرة.

طيب نتجوز ليه؟
علشان ندخل الجنة.
لو سمحتم ماحدش يستغرب فكروا فيها تجدوها صح و بالمناسبة لما تحب حد بحق و حقيقى لن يكفيك أن تحبه طول العمر بل تحتاج لأن يستمر هذا الحب إلى ما بعد هذه الحياة و بالطبع سيستمر فى الجنة لمن سيفوز بها أما إذا دخلوا النار وقانا الله منها فلا أعتقد أن الحب سيستمر.
ممكن حد يسأل هو إيه علاقة الجواز بالجنة؟
أقول أنها علاقة أساسية فزواجك قد يؤدى بك إلى الجنة أو لا قدر الله إلى النار.
فالهدف من الزواج هو بناء أسرة مستقرة تعين كل أفرادها على الحياة بشكل جيد و أداء ما عليه من واجبات تجاه دينه فأولا نحن نتزوج لنعف أنفسنا و نبتعد عن الفاحشة و الزنا ثم يتعاون الزوجان على طاعة الله و يقوى كل منهما الآخر و يبذل ما فى وسعه حتى يحمى الآخر من الوقوع فى الآثام و الرذائل، ثم يأتى بعد ذلك تربية الأبناء و هى الدور الأهم و الأكبر للزوجين اللذين أصبحا أبوين و هنا يستكمل الجزء الأكبر من الطريق إلى الجنة حيث أن إحسان تربية الأبناء له أجر كبير جدا و له من الفضائل الكثيرة و ربما وجود ابن صالح يكون هو السبب فى دخول الجنة فالإبن الصالح أو الإبنة الصالحة ربما بفضل تربيتهما على الخير يكونان سببا فى زيادة الهداية للأبوين ثم بعد وفاة الوالدان من سيدعو لهم غير الولد الصالح؟ و أنتم تعلمون أن عمل ابن آدم ينقطع بعد موته إلا من ثلاث صدقة جارية أو علم نافع أو ولد صالح يدعو له. ربما لا نملك المال الذى ننفقه فى الصدقة الجارية و ربما لا نملك العلم الذى ينفع الناس و لكن أبنائك و بناتك تملك أن تربيهم و تعلمهم دينهم و تصل بهم إلى أن يبروك و عنده سيدعون لك فى حياتك و بعد مماتك و اعلم أن هذا ما ينفعك بعد موتك فلا المال و لا الجاه و لا السلطان سيكون لهم أى نفع بعد الموت.
إعلم أيها الأب أنك مسئول عن أخلاق و دين أبنائك أما المال فالمطلوب منك فقط توفير احتياجتهم الأساسية و لست مطالبا بترك ثروة لأبنائك حتى تؤمن لهم مستقبلهم كما يقول الناس فالمال لا يؤمن مستقبلا و أنتم تعلمون الواقع و ترون أن الأهل إذا انشغلوا بجمع المال ضاع الأبناء فالمال لا يربى و لا يقى من الإنحراف بل للأسف أن وفرة المال فى يد الأبناء فاقدى الدين ييسر لهم الإنحراف بكل أشكاله من مخدرات و خمر و زنى و فجور و نرى الكثير من أبناء الأثرياء محطمين نفسيا لأنهم لم يشعروا بالدفئ الأسرى فالأبوان منشغلان بجمع المال و كلما احتاجهم الأبناء للكلام أو النقاش أو كان لديهم استفسار أو احتياج لخبرة من الآباء ما وجدوهم و ربما نهروهم بقولهم أنا مش فاضيلك مش كفاية شغال ليل و نهار علشان أجيب لكم فلوس تجيبوا بيها كل اللى نفسكم فيه.
عجبا كأن دور الأبوين فى الحياة هو توفير المال فقط!
فمن يربى إذا؟ التربية شئ مهم جدا و شاق جدا و يحتاج إلى الوقت و الجهد و المثابرة حتى ينشأوا صالحين، و لكن ما الفائدة فى ثروة تشترى كل شئ حتى الشهادة و الوظيفة المحترمة و الشخص نفسه خاويا يعلم أن ما حصل عليه من نجاح ليس بقدراته الشخصية و لكن بمال أبيه و لا يهتم هذا الإبن إلا بنفسه فهو أنانى و لن يفكر فى الدعاء لوالديه بعد موتهما فكل ما يشغله هو الثروة التى سيرثها حتى ينفقها على ملذاته.

موضوع الزواج كطريق للجنة موضوع كبير و يحتاج لتفكير كثير.

أما السؤال الباقى نتزوج من؟
فيجب أن تكون الإجابة مرتبطة بالهدف و نجيب هنا بسؤال هل لو تزوجت الفتاة ببراد بت أو توم كروز ستدخل الجنة؟ و هل لو تزوج الشاب بملكة جمال ثرية هل سيدخل الجنة؟

مع العلم أن البحث عن مواصفات سطحية سوف يجعل الزوج أو الزوجة فى صراع نفسى دائم لأن الجميل دوما هناك من هو أجمل منه بالإضافة إلى أنك حققت حلمك بالزواج من جميلة أو وسيم ثم ماذا بعد هذا هل سيقيم الجمال بيتا؟ و هل سيحقق الثراء راحة؟

و السؤال الأهم هل تستطيعون تحقيق حب يدوم بعد الموت و يستمر فى جنة الخلد؟
أتمنى لكم جميعا أن تحصلوا على هذا الحب.

و أرجوكم فكروا و قرروا من تريدون زوجا؟