منقول من مدونة بنت خيخة و أى كلام
النظافة من الإيمان
البوست ده بناءاً على طلب الجماهير
وهما مش جماهير أوى بصراحة
هما اتنين بس من القراء الأعزاء
واحد وواحدة
بيعانوا من نفس المشكلة
وهى عدم نظافة شريك الحياة
وطلبوا مني انى أكتب عن الموضوع ده
الراجل اللى بعتلي مشكلته
كانت مشكلته صارخة ومقززة
وحالته تصعب على الكلب الاعور الحزين
اما البنت فامشكلتها بسيطة بجانب مشكلة الراجل
ولو انها تظل مشكلة مقرفة برضه
انا مش هادخل فى تفاصيل المشكلة
لكن من كلامى اعتقد انكم هتفهموها وهى طايرة
النهاردة كلامي عن النظافة
نضافة شريك الحياة
هاتكلم فى الاول عن نضافة الست
يعنى الكلام ده موجه للستات دلوقتى
والكلام برضه من وجهة نظرى انا
يعنى يحتمل الصواب ويحتمل الخطأ
ويحتمل انى اكون مزوداها شويتين
لان موضوع النظافة بيكون نسبة وتناسب
وتختلف درجته من شخص لأخر
كلامى للستات المتجوزين
النضافة اساس اى شئ
ودرجة نظافتك لنفسك ولبيتك ولعيالك
بتؤثر بشكل أو بأخر بعلاقتك بجوزك
يبقى لازم تهتمى جدا بنظافة كل ماهو حولك
ليييييييييييييييييييييه؟
علشان لو جوزك رجع من شغله
ولقى إن رحتك مش حلوة وهدومك مبقعة ومبهدلة
وعيالك هدومهم وسخة وعليها بقايا اكل
وعيونهم معمصة ومناخيرهم مبربرة
وارضية البيت مش مكنوسة
والمواعين تضرب تقلب فى المطبخ
والملاية بتاعة السرير متربة وحالتها حالة
جوزك غصب عنه هيقرف منك ومن عيالكم
ومن البيت وهيبقى مش طايق الرجوع للبيت
يبقى انتى هتعملى اييييييييه؟
انتى لازم تبقى نضيفة ولابسة لبس نضيف
مش هاقولك البسى واتزوقى
لأن حتى ولو كنتى لابسة
قميص نوم كستور بس نضيف
هتفرق مع جوزك
لما يكون شعرك متسرح
ولو حتى كنتى عملاه كحكة على قفاكى
بدل امنا الغولة اللى بيرجع يلاقيها قدامه
دى حاجة هتفرق معاه
انا مش بقولك اصبغيه
أو اعمليه سشوار انا بقولك سرحي شعرك
وعلى فكرة ابسط قواعد التزويق هى امور النضافة
يعنى مش لازم تكونى لابسة
حاجة مثيرة علشان تبقى حلوة
لكن لازم اللى انتى لابساه ده
يكون نضيف علشان جمالك يكتمل
ومش لازم تبقى صبغة شعرك علشان تكونى حلوة
لكن لازم تكونى مسرحة شعرك علشان تكونى حلوة
لما ولادك يكونوا نضاف وبتحميهم كل يوم
ولو وقعوا حاجة على هدومهم تغيريها فورا
ومتسبيش البرابير على مناخيرهم
وعلطول تحطيلهم كولونيا
هتلاقى جوزك لما بيشوف العيال
بياخدهم فى حضنه وبيلعب معاهم
لانه مش قرفان منهم
ابقي اكنسي بيتك من وقت للتانى
واغسلى المواعين بانتظام ويوم بيوم
وحتى لو بتجيلك شغالة
ماتعتمديش عليها اعتماد كلى
افرضى لاقيتى عنكبوت معشش فى اوضة النوم
مش معقول ابدا تسيبى العنكبوت
لحد ماتيجى الشغالة تشيله
شيليه انتى يا بطة منك ليها
لو بنتك اتقايت فى الحمام
مش معقول ابدا تسيبى القيئ
لحد الشغالة ما تيجى تانى يوم تمسحه
لو حاجة ادلقت على الترابييزة
قومي فزي وامسحى الترابيزة
بلاش جوزك يرجع من الشغل
يلاقى أن اثار قعر كوبايات الشاى
اللى اتدلدأ منها حبة شاى الصبح
لسة موجودة من صباحية ربنا
وانك مافكرتيش طوال الاتناشر ساعة
اللى غابهم طول اليوم
انك تجيبى حتة القماش البيضا اللى فى المطبخ
وانك تمسحي أثار الدلدئة
لو كنتى مطولة ضوافرك نوع من انواع الانوثة
يبقى لازم تهتمى بيهم دايما
وتبرديهم وتنضفيهم من الميكروبات السودا
لو انتى مش بتطوليهم
يبقى لازم كل يومين تقصفيهم بالقصافة
علشان اهمالهم بيلم الميكروبات السودا
وبيخلى شكل ايدك مقرف
لو بتاكلى سمك مشوى
وضوافرك طويلة
بعد ما تقشرى السمك المشوى
روحى اشطفى ايدك من القشر
علشان القشر بيدخل بين ضوافرك
وبيخلى شكل ايدك بشع
وممكن عين جوزك تقع على ايدك
وهى فى الحالة دى
وساعتها هيكون منظرك مقزز جدا
اعملى سويت دايما
فى منطقة العانة ومنطقة تحت الإبطين
شريف هاني بيحب مامي وبابي وبحب نوني كمان وبابلو
معلش يا جماعة بس الجملة اللى فوق دي
شريف اصر انه يملهاني واصر انى اكتبها قدامه
وقالى اوعى تمسحيها وانا وعدته انى مش هامسحها
المهم نرجع لكلامنا
كنت بقول على موضوع السويت
ياستات يا متجوزات
نضافة اجسامكم تؤثر بشكل كبييييييييير
فى مسألة الهونجا بونجا
ولما الهونجا بونجا تبقى تمام
الحياة الزوجية بتكون تمام بنسبة كبيرة
بين قوسين مش دايما
نيجي للرجالة بقى
وعلشان صاحبة المشكلة على اخرها من جوزها
ومش عارفة تعمل معاه ايه
انا هاقول نصايح عامة
وان شاء الله زوج المدعوة يقرا
وعله يستفيد
يا رجالة
لو سمحتوا من فضلكم
اغسلوا رجليكم بعد ماتقلعوا الجزمة
لأن ريحة رجليكم بتكون مأساوية بشكل غير طبيعي
ولو سمحتوا اغسلوا اسنانكم بانتظام
ولو مش عايزين تغسلوها بانتظام
يبقى أقل مافيها تغسلوها قبل ما تبوسوا مراتتكم
خصوصا المدخنين منكم وأكلى البصل والتوم
لأن ريحة بؤكم بتقرف الكلب الأعور الحزين
وبلاش التجشؤ بصوت عالي
وبلاش تعملوا بوئة قدام مراتتكم
ابقوا ادخلوا الحمام وجيصوا براحتكم فيه
وابقوا خففوا شعر الإبطين ومنطقة العانة
علشان مراتتكم متقرفش منكم
فى مسألة الهونجا بونجا
يعني بلاش الست تحس
انها بتعمل هونجا بونجا مع غوريلا
وبلاش تعملوا الصوت اللى هو
بتجيبوا برابيركم من اعماق مناخيركم
وتيجوا تافينها فى الحوض
ابقوا اعملوا الحركة دى
وانتوا قافلين على نفسكم باب الحمام
وبلاش تعملوها فى العلن وتروحوا الحمام
عند اخر لحظة اللى هى لحظة تف البرابير
يعنى ياريت بعد اذنكم كل مراحل تف البرابير
تتعمل فى الحمام ويكون بابه مقفول عليكم
بس خلاص
أخر الكلام
من نظف ثوبه قل همه ... و من طاب ريحه زاد قدره
إنتهى
بت خيخة وأي كلام
(منقول بالنص بدون أى تصرف منى)
15 comments:
أنا قرأته فى مدونة صاحبة البوست وكنت أفضل أن حضرتك تكتبه بأسلوبك مش مشكلة لما كلنا نكتب عن نفس الموضوع فكل واحد
فينا له أسلوب وطريقة عرض مختلفة
السلام عليكم
الله على حضرتك بجد تسلم ايديك فعلا النظافه من الايمان انا عن نفسى الحمد لله بموووت فى النظافه للدرجة انى موسوسه قوووووى لابعد الحدود
ربنا يرحمنا برحمته
دمت بكل خير
تحياتى
د/ كافى
السلام عليكم
بالفعل لقد صدقت فى هذه المقوله
النظافة من الأيمان
أشكر حضرتك على أمانه النقل
خالص تقديرى
منى
سلامى لك
أنا نقلته لسرعة توصيل المعلومة لأنها دققت و أسهبت فى تفاصيل مهمة و يمكن كان إسلوبها بينقل شعورها للآخرين ففضلت إن الشعور كمان يوصل
أنت تسأل و الكمبيوتر يجيب
فعلا شرفتم مدونتى و أنا من المهتمين بسماع البنامج منذ سنين طويلة
شكرا لمروركم
عاشقة الأحزان
أشكرك على إطرائك الجميل بس اللى تستاهل الشكر هى بنت خيخة صاحبة الكلمات.
دامت لك السعادة
تحياتى
العصفورة
نورت المدونة يا عصفورة أنا سعيد قوى بيكى كصاحبة مدونة فى سن مبكر، عندى أمل أشوفك حاجة كبيرة لما تكبرى
loooool
على كثر ما التدوينه مفيده
على كثر ما هي طريفه ومضحكه
اسلوبك سلس وجميل
تقبلي مودتي :)
شكرا قصقوصة بس ده مش إسلوبى أنا كما أوضحت
أتمنى دوام الزيارة و أعرف رأيك فى مقالتى المكتوبة بإسلوبى
تحياتى
انت لسه هنا؟
لا لا تعالى بسرعه عندنا
تيمون وبوبما عايزينك
كل ما تضحك اكتر كل تاكل بطاطا اكتر
هاكونا مطاطا
مش هتقدر تغمض عنيك
هاكونا مطاطا هديتنا لكل المدونين عشان نخرج من حاله النكد
هاكونا مطاطا تهييس للصبح
هاكونا مطاطا ... لااااا للملل
هاكونا مطاطا... قول لاء للهم
هاكونا مطاطا.... اوعى تزعل ابدااا
هاكونا مطاطا... ارمى الماضى ورا ضهرك
انسى الماضى اللى يغيظ
يلاااااااااا تعالى مستنى ايه
وياريت تضيف اللينك عندك
ومش هتندم ابدآ
مودتى
اللهم لك الحمد والشكر
كان زوجى من افضل رجال العالم فى النظافه والجمال
ويمكن علشان كدا مات بدرى
الله يرحمه
فعلا النظافه دى من اساسيات الحياه الزوجيهوعليها عامل كبير جدا جدا فى السعاده
وكفايه ان حبيبنا ونبينا صلى الله عليه وسلم قال كدا: النظافه من الايمان...
بوست رائع وكوميدى خالص
وشكراً على النقل
ودمت بخير حال
ماما
====
نورتينا يا سيدتى
الله يرحم زوجك، كلامك عنه يدعم رأى لدى أن الطيبين ليس لهم مكان فى هذه الدنيا فيسارعون بتركها.
بارك الله فيك و جزاك خير على حفظك حلو سيرته
واحد من العمال
==============
نورتنى و أشكرك على التعليق
شركة تاج للتنظيف بالدمام 0551844053
شركة مكافحة حشرات بالدمام
شركة رش مبيدات بالدمام
شركة تنظيف شقق بالدمام
شركة تنظيف فلل بالدمام
شركة مكافحة حشرات بالخبر
شركة تنظيف شقق بالخبر
شركة تنظيف بالدمام
شركة تنظيف سجاد بالدمام
شركة مكافحة حشرات بالاحساء
شركة مكافحة النمل الابيض بالاحساء
شركة مكافحة حشرات بالجبيل
شركة تنظيف سجاد بالجبيل
شركة مكافحة النمل الابيض بالجبيل
شركة تنظيف منازل بالجبيل
شركة رش دفان بالدمام
شركة مكافحة النمل الابيض بالدمام
Post a Comment